एलिना डन : कन्टेन्ट क्रिएटर हुँदै अब नयाँ यात्रामा

‘एलिना डन’ रुपमा चर्चित एलिना गुरुङ धेरैले मन पराएको कन्टेन्ट क्रिएटर हुन् । १० वर्षदेखि कन्टेन्ट र भिडियो क्रिएसनमा सक्रिय एलिना अहिले भने नयाँ बाटोमा छिन् । २६ वर्षीया एलिना भन्छिन्, ‘मलाई मेरो आफ्नो करियर चाइल्ड साइकोलोजीमा बनाउन मन थियो । त्यसैले म करियर तिरै फोकस छु ।’एलिनाले होटल म्यानेजमेन्टमा प्लस टु, पत्रकारितामा स्नातक र साइकोलोजी (मनोविज्ञान)मा स्नातहकोत्तर गरेकी छन्। कन्टेन्ट क्रिएटर रहेकी एलिना अहिले भने आफ्नो नयाँ परिचय बनाउन लागिपरेकी छन्।‘म चाइल्ड साइकोलोजिस्टको रूपमा काम गरी रहेकी छु,’ उनी भन्छिन्, ‘अटिज्म भएका बालबालिकालाई ‘बिहेभियर’ थेरापी दिने काम गर्छु।’ डेढ वर्षदेखि उनी साइकोलोजिस्टको रूपमा काम गर्दैछिन्। त्यसैले अहिले भिडियोमा धेरै समय दिन नपाएको उनले सुनाइन्।‘क्लिनिकमा पुरै समय दिईरहेको हुन्छ, त्यसले गर्दा कन्टेन्ट क्रिएसनमा समय दिन पाएको छैन,’ एलिनाले थपिन्। आफ्नो तरिकाले कन्टेन्ट बनाइरहेकी एलिनालाई पुरै समय क्लिनिकमा काम गर्न भने सुरुमा गाह्रो परेको थियो। तर आफूले यसैमा करियर बनाउने सोचेको र विशेषगरी बालबालिका मनपर्ने भएर थेरापिस्ट भएर काम गर्न आनन्द आईरहेको सुनाइन्।‘कन्टेन्ट क्रिएसन एकदमै सजिलो थियो। मैले यसमा धेरै समय बिताए पनि,’ आफ्नो अनुभव सुनाउँदै उनले भनिन्, ‘तर जसरी क्लिनिकमा काम गर्न थालेपछि थेरापिस्टको रुपमा धेरै गाह्रो हुँदो रहेछ। सोचेजस्तो नहुने। किनभने अटिज्मको केसमा पनि विभिन्न खालको बालबालिकासँग घुलमिल हुनुपर्ने हुन्छ। एकदमै गाह्रो भए पनि तर मलाई यो काम मन परिरहेको छ।’कन्टेन्ट क्रिएटरको रूपमा आफू अहिले कम सक्रिय भए पनि नयाँ नामको लागि काम गरिरहेको उनी सुनाउछिन्। ‘कन्टेन्ट क्रिएसनमा करिय राम्रो छ। मेरो जहिले पनि सोच के थियो भने कन्टेन्ट क्रिएसन जहाँसम्म गर्छु–गर्छु,’ एलिनाले सुनाइन्, ‘त्यो कारणले एउटा समयमा गएर कन्टेन्ट क्रिएसनलाई पछाडी राख्नुपर्छ भनेर सोचेको थिए। नभन्दै अहिले त्यस्तै भईरहेको छ।’एलिनाको घर तेह्रथुम हो। तर काठमाडौंमै जन्मिएर हुर्किएकी एलिनाको परिवारमा आमा, बुवा, दिदी र एक जना भाई छन्। ‘परिवारको इच्छा मैले पढोस् भन्ने थियो,’ उनले भनिन्, ‘मैले मास्टर नि सके। यहाँसम्म आईपुग्न मेरो परिवारको ठूलो सहयोग छ।’एलिनाले सन् २०२१ मा ‘आमा’ र २०२२ मा ‘भूगोल’ सर्ट मुभिमा पनि अभिनय गरेकी छन्। त्यतिमात्र नभई एलिनाको नयाँ ‘प्रयास’ नामको म्युजिक भिडियोमा पनि ‘ल्यान्ड लेडी’ को अभिनयमा देखिएकी छन्। साथै फुर्सदको समयमा विभिन्न ब्रान्डसँग मिलेर कन्टेन्ट बनाउँछिन्।कान्तिपुरको भिडियो कार्यक्रम ‘बियोन्ड द फिड्स’ मा एलिनाले आफ्नो पढाई, कन्टेन्ट क्रिएटरको अनुभव र अबको सपनाबारे बताएकी छन्।